BAGUIO CITY – Pinadayawan ti Health Justice Philippines dagiti addang ti lokal a gobyerno ti siudad ti Baguio para iti panakagun-od ti Smoke Free Baguio.
Karaman kadagitoy ti nainget a panakaipawil ti panakailako ti sigarilyo ken vape nangruna kadagiti ubbing; panakaiparit ti panagsigarilyo kadagiti para-publiko a lugar ken panakaipatungpal ti suprise inspection kadagiti business establishment a mangituntunda iti panakakumpiskar dagiti vape, sigarilyo ken daduma pay a tobacco products.
Malaksid iti dayta, agtultuloy ti information dissemination campaign ti lokal a gobyerno; pagkapkap kadagiti estudyante sakbay a sumrekda iti klase dagitoy; ken panakaipaay ti citation ticket kadagiti violators.
Sigun kenni Ralph Degolacion, Managing Director ti Health Justice Philippines, maysa a napintas a pakaiyarigan ti lokal a gobyerno ti siudad gapu ta epektibo ti estratehiya daytoy tapno matungpal dagiti pagannurotan ken malapdan ti panakaadik dagiti agtutubo iti nasao a bisyo.
Kinuna pay ni Daryll Kim Longid, mangidadaulo iti Public Order and Safety Division – Baguio, a kasapulan ti panagkaykaysa ti komunidad, pagadalan ken dagiti nagannak tapno naan-anay a maikkat dagiti problema a patauden ti vape ken sigarilyo.
Apela ni Longid iti komunidad ken kadagiti bisita a tungpalenda dagiti polisiya ti siudad seknan iti panagsigarilyo ken panagvape.
Kabayatanna, maibasar iti panagadal idi napan a tawen, nagtultuloy ti panagbaba ti bilang dagiti agar-aramat ti tabako ngem nagtultuloy a ngimmato ti bilang dagiti agar-aramat ti vape iti siudad partikular kadagiti agtutubo.
