BAGUIO CITY – Kidkiddawen dagiti mayor iti probinsia ti Benguet ti panakanayon dagiti contact tracers iti masakupanda tapno mapagsaganaan ti pangta ti delta variant.
Sigun kadagiti mayor, nasaysayaat no manayonan wenno maisubli ti 70 a bilang dagiti contact tracers nga nagleppas ti kontratada idi napan a lawas.
Kinunanada a dakkel ti maitulong dagiti contact tracers nga agreponde iti posible nga iseserrek ti delta variant gaputa mapapartak ti contact tracing ken vaccine roll-out iti probinsia.
Inlawlawag met ti Department of Interior and Local Government nga awanen ti pundo a mabalin a maipaluspos para iti nasao a kiddaw.
Gapu iti daytoy, kidkiddawen ti ahensia a no mabalin ket sweldoan paylaeng dagiti lokal a gobyerno dagiti kanayonan a contact tracers bayat a maur-uray paylaeng ti P1-B a pundo nga ipaay ti nasional a gobyerno.
