BAGUIO CITY – Mangnamnama ni Arthur Carlos, kapitan ti Barangay Irisan a saanen a manayunan pay ti bilang dagiti pimmusay nga indibidwal gapu iti sakit a dengue iti nasao a lugar.
Kasaruno dayta ti ipupusay ti agtawen sangapulo nga ubing manipod San Carlos Heights gapu iti dengue.
Inaklonna nga adu ti kaso ti dengue iti masakupanna ngem mangnamnama ladta a saan a daytoy ti mangmangruna kadagiti amin a barangay iti intero a siudad ti Baguio.
Sigun iti kapitan, dakkel ti maipapaay a tulong dagiti purok leader iti panangpaksyat wenno panangliklik iti nasao a sakit nu sadino dagitoy ti kangrunaan a tumultulong iti regular a panagdalus, panagikkat kadagiti mabalin a pagitlogan dagiti lamok, kasta met ti information dissemination kadagiti residente.
Kinunana nga adu dagiti agtultulnog kadagiti pammilin ngem adda ladta dagiti residente nga awan ti biyangna.
Nupay kasta, sinanamnama ti kapitan nga agtulnog dagiti daduma a residente kadagiti maipapaay a pammilin.//Bombo Rob Dominguez
