Nangisayangkat iti Communication ken Simulation Exercises dagiti kameng iti Baguio City Police Office-Police Station 1 idiay Baguio City Public Cemetery ita aldaw kas paset ti panagsagana iti deployment dagitoy inton bigat para iti sumangbay nga All Souls’ day ken All Saints’ Day.
Daytoy ket babaen iti panangidaulo ni Station Commander Police Major Allan Alog ken ti kooperasyon dagiti nagduduma a yunit iti pulisya.
Iti pangala ti Bombo Radyo iti statement ni Police Major Alog, kinunana a malaksid kadagiti deployment ken monitoring nga ipatpatungpalda iti Public Cemetery, mangipatungpalda metlaeng iti information dissemination babaen iti social media tapno mapalagipan ti publiko kadagiti rumbeng ken saan a rumbeng nga aramiden(Dos and Don’ts) iti nasao nga aldaw.
Kagiddan dayta, pinalagipan ni Alog ti publiko nga agsagana latta gapu ta manamnama paylaeng ti panagbayakabak iti tudo.
Iti sabali a bangir, dumanon met iti mapatta-patta a dua a ribo dagiti sumarungkar iti nasao a parapubliko a sementaryo ita a tawen.
Nupay kasta, impasiguradona a nakasagana metlaeng dagiti kameng iti pulisya nga ipaay ti anyaman a tulong a kasapulan dagiti sumarungkar.//Bombo Jez Lapizar
