BAGUIO CITY – Agpapaimbag paylaeng iti recovery unit iti maysa nga ospital sadiay Como, Italy ti 48-anyos a lalaki a Pinoy worker a nagpositibo iti COVID-19.
Mapapati a naakaran ti nasao a kailyan iti coronavirus manipud iti factory a pagtatrabahuan daytoy.
Iti met interview ti Bombo Radyo Baguio kenni Bombo International Correspondent Jennifer Liwanag manipud Como, Italy, kinunana a narisgo met latta ti kasasaad dagiti Pinoy workers sadiay.
Partikular a dinakamatna dagiti addaan iti trabaho a mangikalkalikagum a nasken a rumwar iti pagnanaedanda dagiti Pinoy workers.
Inlawlawagna a saan a karaman dagiti domestic helpers kas kadagiti baby sitters, caregivers ken dagiti agtatrabaho iti balay kadagiti nainget a mapawpawilan a rumwar iti pagtaengan ken saan a napalubusan a sumrek iti trabaho.
Dinakamatna pay nga iti maysa a survey kadagiti Pinoy workers sadiay Italy ket adu dagiti nangibaga nga agawidda ditoy Pilipinas no adda ti ipaay ti gobyerno ti pagilian nga eroplano a mangsukon wenno pagluganan dagitoy.
Kabayatanna, inladawan ti maysa nga OFW sadiay Milan, Italy nga arigna ghost town ti ayanna ita kalpasan a naideklara ti lockdown sadiay gapu iti panagngato ti kaso ti positibo a COVID-19.
Sigun kenni Bombo International Correspondent Melba Sumingwa, awanen dagiti makita a tattao kadagiti kalkalsada sadiay Milan kas resulta ti nainget a pammilin manipud iti gobyerno ti Italy nga agtalinaed laeng dagiti tattao iti uneg ti pagtaenganda.
Kinunana a nakarikep amin dagiti establisyemento iti lugarda malaksid kadagiti pharmacies ken groceries a mabalinda a paggatangan ti taraon.
Innayonna a mabalinda laeng a rumwar iti pagtaenganda no apanda gumatang ti taraon ken nasken nga adda ti ipakitada a sertipikasyon a mabalinda a rumwar.
