Adalen ti lokal a gobyerno ti Baguio ti kasayaatan a paka-aramatan ti lote ti Bontoc-Ifugao-Benguet-Apayao-Kalinga (BIBAK) iti deppaar ti Harrison Road.
Sigun kenni City Planning Officer Architect Dona Tabangin, nasken a ti mabukel a plano ket suportaranna ti kampanya ti siudad para iti panakapasayaat dagiti paset ti Original Certificate of Title No. 1 a mangsaksakop iti lote iti deppaar ti Governor Pack Road, ti Boy Scouts of the Philippines, Session Road, Diego Silang ken Burnham Park.
Kinunana a malaksid iti economic enterprise, ikonkonsidera ti siudad ti nagduduma a singasing para iti panakapasayaat ti nasao a lote a makatulong iti recovery and resiliency plan ti lokal a gobyerno ti Baguio kasaruno ti nakaro nga epekto ti agdama a pandemya iti sektor ti ekonomiya.
Immunan a naala ti siudad ti suporta ti Department of Environment and Natural Resources (DENR) para iti implementasyon dagiti napapateg a proyekto iti nasao a sanikua a mangpabalin iti dautoy kas maysa kadagiti kangrunaan nga economic hub ti Baguio iti masakbayan.
Maipimpilanen ti katulagan ti lokal a gobyerno ti Baguio ken ti DENR para iti panakapasayaat ti nasao a lote ti BIBAK.
Innayon ni Tabangin nga interesado metlaeng ti Boy Scouts of the Philippines a makitinnulag iti siudad para iti implementasyon ti dagiti partikular a proyekto iti lote ti BIBAK nga okopado ti grupo rapnu maitunos iti development plan a nakasaganan para iti nasao a disso.
Dinakamatna pay a karaman iti plano ti panaka-aramat ti disso a mangkonkonektar iti Governor Pack Road ken Diego Silang Street kas access road.
Sigun kenni Tabangin, awaten ti lokal a gobyerno dagiti singasing manipud kadagiti maseknan a sektor iti kasayaatan a paka-aramatan ti lote tapnu makapataud daytoy ti kanayonan a pondo para iti siudad kagiddan ti panakabukel ti trabaho para kadagiti kangrunaan a naapektaran iti agdama a pandemya.
