Naobserbaran ti panagbaba iti bilang dagiti balud iti Baguio City Jail-Male Dormitory.
Iti panakiuman iti Bombo Radyo kenni Jail Chief Inspector John Wayland Lapon, jail warden iti Baguio City Jail-Male Dormitory, manipod iti nasurok tallo gasut a bilang dagiti balud idi napan a tawen ket nagbalin laengin daytoy a nasurok dua gasut.
Sigun kenni Lapon, naobserbaranda metlaeng a napartak ti panakaiproseso ken panakaileppas dagiti kaso dagitoy.
Mainaig iti dayta, imbinglay iti opisyal nga agtaltalinaed nga adda ti pakainaiganna iti iligal a droga ti kaadwan kadagiti kaso a sangsangwen dagiti Persons Deprived of Liberty(PDLs).
Iti baet dayta, sipapannakkel nga imbinglay ti opisyal a nagun-odda ti pammigbig kas drug-free facility gapu kadagiti ipatpatungpalda a measures tapno maliklikan ti panagserrek ti kontrabando iti nasao a pasilidad kas iti regular a greyhound operation ken ti strikto a panangsukimatda kadagiti kagawaan nga ipatpatulod dagiti sumarsarungkar kadagiti balud.
Sigun pay iti opisyal, awan met unay kadagiti balud iti agsagsagrap iti nakaro a sakit iti baet a marikrikna ita ti napudot a panawen malaksid laeng kadagiti kadawyan a sakit kas iti panaguyek.//Bombo Rob Dominguez
