BAGUIO CITY – Nilawlawagan ti Baguio City Police Office dagiti kaso ti mapukpukaw nga indibidual ditoy Baguio City.
Iti pannakiyuman ti Bombo Radyo Baguio ken BCPO CD Pol. Col. Glen Lonogan, pinunasna dagiti damag seknan iti saan a kinatalged ti syudad gapu kadagiti maipadpadamag a mapukpukaw.
Kinunana nga awan iti nasken a pagdanagan ti publiko agsipod ta maikonsidera dagitoy kas isolated cases.
Innayunna a rumrumwar iti imbistigasyon dagitoy a kaaduan kadagiti mapukpukaw ket nagtalaw kadagiti pagtaenganda ken saan a nakawtibo.
Dinakamatna a posible laeng a naburyong laeng dagitoy iti pagtaenganda isu a rinumwarda kadagiti pagtaenganda a saan a nagpakada.
Iti baet ti daytoy, pinagyamananna iti koordinasyon dagiti nagannak iti imbistigasyon nga ipatpatungpal dagitoy seknan iti panagpukar dagitoy.
Mainaig iti daytoy, kinunana nga ad-adda nga nairtengan iti panagwanawanda kadagiti nagduduma a parke ti syudad a kadawyan a pagtamtambayan dagiti agtutubo.
Imbinsana a nangipaay daytoy iti pammilin iti Tourist Police Unit ti BCPO tapnu dagusda a paawiden dagiti ubbing nga agu-ummong kadagiti parke tapnu saanda nga agkatangkatang sadiay.
