Impablaak ti Leyte Provincial Police Office a naipilan ti kaso nga illegal possession of firearms ken panaglabsing iti election gun ban kontra kadagiti pito a pulis a mapapati a karaman iti pannakapalpatog ni Albuera mayoral candidate Kerwin Espinosa.
Sigun kenni director Police Colonel Dionisio Apas Jr., sumagmamano kadagiti sangapulo ket uppat a firearms a narekoberda manipod kadagiti kameng ti pulisia ket saan a nakarehistro, pakairamanan dagiti rifle ken pistol.
Numan pay saan a nainaganan dagiti pito a pulis a karaman iti kaso, kinuna ni Apas a dagiti persons of interest ket pakairaman ti maysa a police colonel, maysa a lieutenant colonel, maysa nga staff sergeant, tallo a corporal, ken maysa a patrolwoman.
Imbinglay ti nasao nga opisial a dagiti pito a persons of interest ket negatibo ti resultada iti paraffin test.
Ngem sigun met kenni Police Lieutenant Colonel Vivien Malibago, dadaulo iti forensic unit, ti negatibo a resulta ket saan a “conclusive” wenno saan a mangipaay iti “definite conclusion.”
Maipalagip nga adda ni Espinosa iti campaign event idi Abril 10 idi pinaltogan ti saan pay nabigbig a lalaki nga aglemlemmeng iti tawa ti entablado manipud iti likudan babaen ti saan pay a naduktalan a kita ti paltog.
Nagsagrap ni Espinosa iti sugat iti makannawan nga abagana.
Imbatad ni Espinosa a “politically motivated” ti nasao a panagatake.
