Mapalpalagipan ti publiko nangruna dagiti agtartaraken iti baboy nga agridam dagitoy tapno maliklikan ti panagwaras ti African Swine Fever.
Kasaruno daytoy iti nakompirmar a kaso ti African Swine Fever iti sitio Moatong ken sitio Karadig, Barangay Poblacion iti Munisipio ti Bokod, Benguet.
Maibasar iti social media post ti Local Government Unit iti nasao a munisipio, nagpalagip dagitoy kadagiti agtartaraken iti baboy nga agtungpalda kadagiti pagalagadan tapno maliklikan ti pagwaras ti nasao a sakit ti baboy.
Sigun iti local government Unit ti nasao a munisipio, liklikan ti publiko a gumatang kadagiti sibibiag, fresh ken naproseso a karne ti baboy kadagiti nasao a lugar.
Mabalbakadan metlaeng ti publiko a paingtengenda dagiti biosecurity measures dagitoy kas iti panangdis-infect kadagiti kulungan dagiti tarakenda a baboy.
Makidkiddaw met ti dagus a pannakipakaammo dagitoy iti posible a kaso ti ASF iti Municipal Agriculture Office iti Bokod para iti napartak nga aksion.
Maibilbilin met kadagiti resindente nga amin a taraken dagitoy a nagpositibo iti ASF ket kasapulan a maikali.
Kabayatanna, maaw-awis dagiti dadduma a barangay sadiay nga impatumpalda metlaeng dagiti nasao a pagalagadan tapno maliklikan ti panagwaras daytoy.//mp4
