BAGUIO ITY – Dumanon itan iti 4,760 ti pakabuklan a kaso ti COVID19 iti Cordillera Administrative Region.
Maibasar iti datos ti Department of Health – Cordillera, dumanon iti 1,182 ti aktibo a kaso ti nasao a sakit kalpasan a nailista ti kanayunan a 136 a kaso idi kalman.
Nairekord ti 76 a kabarbaro a kaso ditoy syudad, 44 a kaso iti probinsya ti Benguet, siam sadiay Apayao, uppat sadiay Ifugao; saggaysa sadiay Mountain Province ken Ifugao
Malaksid iti dayta, dumanonen iti 3,531 ti pakabuklan a bilang dagiti naimbagan kalpasan a nagrekober idi kalman ti 95 a nagpositibo ditoy siudad ti Baguio, 22 sadiay Benguet, dua sadiay Kalinga ken maysa sadiay Abra.
Nanayunan met ti bilang dagiti pimmusay iti nasao a sakit ken nailista daytoy sadiay Tabuk City, Kalinga isut gapu a dumanon itan iti 49 ti pakabuklan a bilang dagiti pimmusay.
Naammuan a ti pimmusay a pasyente a lalaki ket agtawen iti 53 ken naipadamag nga empleado ti National Irrigation Administration-Kalinga (NIA-Kalinga).
Maibasar iti report, agsagsagaba ti pasiente iti diabetes ken hypertensiyon ken maatap a naakaran iti COVID-19 manipud iti nakapulapolna a nagpositibo iti nasao a sakit.
