BAGUIO CITY – Dakkel ti panagbaba ti kaso ti dengue fever iti rehion Cordillera manipud idi Enero agingga ita a bulan ita a tawen no idilig kadagiti kapada a bulan idi napalabas a tawen.
Maibasar iti datus ti Department of Health (DOH) – Cordillera, ita a tawen ket nailista ti 668 a kaso ti dengue fever nga addaan dua nga ipupusay bayat nga idi napalabas a tawen ket dimmanon iti 5,080 nga addaan ti 11 nga ipupusay.
Sigun kenni DOH-Cordillera Nurse 5 Geeny Anne Austria, ti 86% a panagbaba iti kaso ti dengue fever ket resulta ti saan a panagturong ken panagpataming kadagiti health facilities dagiti indibidual a posible nga addaan ti dengue fever.
Malaksid iti daytoy, dinakamatna nga idi napalabas a tawen ti panawen ti panagpaadu dagiti lamok a nakaimet iti dengue virus.
Patienda metlaeng a maysa ditoy a rason ti panag-garden dagiti umili ita a community quarantine nga agresresulta iti panagdalusda metlaeng iti aglawlaw.
Impeksa pay ti ahensia ti inanamada nga agisayangkat dagiti tattao kadagiti pisikal nga aktibidad a makatulonf iti panakaparmek ti risgo iti impeksion ti dengue fever babaen iti panagdalusda kadagiti mabalin a pagitlogan dagiti lamok kabayatan ti agdama a quarantine.
