BAGUIO CITY – Bimmaba ti kaso ti dengue ken dadduma pay a sakit kabayatan ti quarantine ditoy siudad ti Baguio.
Maibasar iti report ti City Health Services Office, dumanon laeng iti 106 ti kaso ti dengue ditoy siudad manipud Enero Uno aginggat Oktubre 3 ti agdama a tawen.
Nababbaba daytoy iti 83.79 percent no idilig iti 654 a kaso a nailista iti kapada a bulan idi napalabas a tawen.
Nairekord dagiti kaso ti dengue iti Country Club Village, Happy Hollow, Lower Rock Quarry, Bakakeng Central ken dadduma pay.
Malaksid iti dengue, bimmaba met laeng ti kaso ti acute bloody diarrhea a dumanon iti pito ita a tawen manipud iti 82 idi 2019.
Dumanon met iti 15 ti kaso ti hand-foot-mouth diseases ita a tawen manipud iti 142 idi napalabas a tawen.
Nailista met ti 14 a kaso ti Hepatitis ita a tawen manipud iti 77 idi napalabas a tawen, influenza-like illnesses a 267 ita a tawen manipud iti 792 idi 2019, kamuras a 222 ita a tawen manipud iti 442 idi napalabas a tawen.
Bimmaba pay iti kaso ti typhoid fever a 11 ita a tawen manipud iti 101 a kaso idi 2019.
Iti baet daytoy, inbalakad ni City Epidemiologist Dr. Donnabel Tubera-Panes ti panagtalinaed ti kinadalus ti aglawlawa tapno maliklikan ti sakit.
