BAGUIO CITY- Agtultuloy ti panagngato ti kaso ti dengue iti probinsia ti Benguet kas maibasar iti datus ti Provincial Health Office.
Sigun kenni Provincial Health Officer Dra. Nora Ruiz, dakkel ti ngimmatoan ti kaso ti nasao a sakit idi napan a tawen ken iti umuna a kwarter ti agdama a tawen nu idilig iti 2020.
Nailista ti 407 a kaso idi 2020, 2,211 idi 2021, ken 283 a kaso iti umuna laeng a kwarter ti agdama a tawen.
Manipud kadagiti nakadamat a bilang, dua nga ipupusay seknan iti dengue ti nailista idi 2020; 11 idi 2021 ken maysa iti agdama a tawen.
Dinakamatna a kaadoan kadagiti nakaptan iti dengue ket dagiti agtawen iti sangapulo ket innem agingga tallo.
Manipud iti 283 a kaso ti dengue ita a tawen, nailista ti La Trinidad ti kangatoan a bilang, sinaruno ti Itogon, Kabayan, Kibungan, Kapangan ken daduma pay a municipio iti Benguet.
Gapu iti daytoy, inyunay-unay manen ni Dra. Ruiz ti panangdalus dagiti umili kadagiti paraangan ken daduma pay a disso a mabalin a pakaurnongan ti danum ken pagitlogan dagiti lamok kas ti waig, flower pot ken daduma pay.
