Dumanunen iti sangapulo ket lima ti kaso ti mpox wenno monkeypox iti intero a pagilian, sigun iti Department of Heath (DOH) idi kalman, September 11, 2024.
Nupay kasta, saan nga impablaak ti nasao nga ahensia ti profile ti kaudian a pasiente gapu iti privacy concerns.
Iti sangapulo ket lima a bilang dagiti kaso ti nasao a sakit, sangapulo ket maysa ket manipud iti National Capital Region, tallo iti Calabarzon ken maysa iti Cagayan Valley, nu sadino sangapulo ket uppat kadagitoy ti lallaki ket maysa ti babae.
Impeksa met ti Department of Health a saan nga alarming ti bilang dagiti kaso ti mpox, agsipudta saan daytoy nga airbone ken makaakar laeng daytoy babaen iti skin-to-skin, close intimate contact ken mabalin a maakaran ti maysa babaen kadagiti kontaminado a banag.
Balbalakadan met dagiti Health experts ti publiko a liklikan ti close ken intimate Contact; skin-to-skin contact kas iti seksual a pannakilangen; kissing ken panagarakup kadagiti indibidual a posible wenno nakumpirmar a naapektran iti mpox.
Malaksid iti dayta, kanayun nga aramiden ti proper hand hygiene, dalusan dagiti banag nga inusar dagiti naapektran iti nasao a virus ken liklikan dagiti natay nga ayup a masarakan kadagiti lugar nga addaan iti mpox ken dadduma pay.
Kabayatanna, guyguyuguyen ni Health Secretary Ted Herbosa ti publiko a mang-avail iti libre nga mpox testing, kadagiti government hospitals.
