Dumanonen iti nasurok 1,500 a Pilipino ti makapaspasar ti pertussis wenno “whooping cough” nu sadinno kaaduan kadagitoy ket ubbing.
Manipod idi Abril 13, kinuna ni DOH Assistant Secretary Albert Domingo a pakabuklan ti 1,566 a kaso ti pertussis ti nairekord iti intero a pagilian manipod nangrugi ti agdama a tawen.
Gapu iti dayta, saan a namnamaen ti nasao nga opisial a bummaba ti bilang ti kaso iti kabiitan a panawen.
Iti agdama, agtultuloy ti panaguray ti Department of Health (DOH) ti panagsangpet ti bakuna tapno malapdan ti panagngato ti bilang ti sakit.
Manamnama a sumangpet iti Pilipinas ti tallo a milyon a doses ti bakuna a mabalin a mangsalaknib kontra ti pertussis.
Malaksid iti dayta, manamnama pay ti kanayunan a panagala ti Department of Health ti 5.1 million doses ti bakuna para kadagiti agkasapulan.
