Manarimaan paylaeng ti panagkolektar ti City Health Services Office iti kaudian nga update ti kaso ti leptospirosis iti siudad ti Baguio.
Iti pannakiuman ti Bombo Radyo kenni Dra. Celia Flor Brillantes, dadaulo ti City Health Services Office, kinunana a maala paylaeng dagiti updated report kadagiti nagduduma a reporting units gaputa kalkalpas laeng ti bagyo.
Ngem maibasar iti agdama a datos ti opisinada, dumanon iti sangapulo ket innem ti nailista a kaso, nangatngato ngem iti sangapulo ket dua a nailista idi tawen 2024.
Kabayatanna, inlawlawag ni Dra. Brillantes a ti leptospirosis ket maysa a bacterial a sakit gapu iti Leptospira bacteria.
Kadawyan a makapkaptan ti maysa a tao babaen iti kontaminado a danum, nangruna nu nagtaud daytoy iti panaglayos wenno kanal nga addaan ti isbu ti utot wenno dadduma nga ayup.
Sumrek ti bacteria iti sugat wenno gasgas ti kudil, wenno kasta metten iti mata, agung, ken ngiwat nu nailumlom iti narugit a danum.
Ti sintomas ti nasao a sakit ket panaggurigor, panagsakit ti ulo, panaglabbaga ti mata, panagsakit ti tiyam, ken dadduma pay.
Mabalin a rummuar ti sintomas iti lima agingga sangapulo ket uppat nga aldaw kalpasan a nakaptan ti nasao a sakit.
Tapno maliklikan, insingasing ni Dra. Brillantes a kasapulan a salakniban ti saka nangruna nu nasugatan daytoy, agkawes ti bota wenno gloves nu kasapulan, liklikan ti isbu ti utot ken dadduma pay nga ayup, ken dadduma pay.
