BAGUIO CITY – Pinagkedkedan ti ina ti Tuba, Benguet ti kiddaw ti grupo dagiti agilaklako ti pailaw ken palibang ditoy lokalidad a panakaipalubos ti panaglakoda iti masakupan daytoy a munisipyo.
Iti panakiyuman ti Bombo Radyo Baguio, kinuna ni Mayor Clarita Sal-ongan a saanna nga ipalubos nga adda ti agilako ti palibang ken pailaw sadiay Tuba para iti holiday season isut gapuna nga imbasurana ti kiddaw ti nasao a grupo kenkuana.
Inlawlawagna a babaen iti daytoy ket maliklikan ti aniaman nga insidente nga itunda ti panagaramat ti pailaw ken palibang ken mapagtalinaed pay ti linak sadiay bayat a mapaspasaran ti pandemya.
Impettengna metlaeng nga ipatiliwda kadagiti pulis dagiti asinoman a matakwatan nga indibidual nga agilaklako kadagitoy a produkto.
Innayonna pay a saan a maipalubos sadiay ti panag-caroling ken epektibo latta ti liqour ban.
