BAGUIO CITY – Supsuportaran dagiti dadduma a konsehal ti kiddaw ni Mayor Benjamin Magalong a mailaylayon ti panakaiparikep ti pasang-at a paset ti Session Road iti tunggal domingo.
Iti panakiuman ti Bombo Radyo kenni Coun. Benny Bomogao, Committee on Public Utilities, Transportation, and Traffic Legislation, patganda ti nasao a panggep la ketdi ta mailawlawag a nalaing ti Mayor ti panggep ti nasao a gakat.
Nupay kasta, inlawlawagna a kasapulan pay ti public hearing iti nagbaetan ti city council, dagiti maseknan nga opisina ken negosyante tapno matalantan dagiti pakaseknan dagitoy.
Innayonna nga adda ti pagimbagan ken pagdaksan ti panakairikep ti session road nangruna ta mangituntunda daytoy nailet a gunay ti trapiko.
Nupay kasta, dinakamatna nga adalenda a naimbag ti panggep a panakailaylayon ti panakairikep ti pa-uli a paset ti session road.
