BAGUIO CITY – Saan a pinatgan ti Cordillera Regional Inter-Agency Task Force (IATF) ti kiddaw ni Abra Governor Joy Bernos a panakasuspindir ti panakaipaay ti Travel Authority kadagiti kayatna ti sumrek sadiay Abra manipud idi December 1 ti agdama a tawen agingga inton January 15 ti sumaruno a tawen.
Nailanad iti sungbat ti Regional IATF kenni Berno a nasken a saan a pagkedkedan dagiti amin a lokal a gobyerno dagiti sumrek iti lugarda a locally stranded individuals wenno LSIs nga addaan met ti kompleto a dokumento.
Nupay kasta, nailanad iti surat a mabalin a maipasidong ti LSIs iti local health protocols and procedures ti lokal a gobyerno kas iti 14-day quarantine ken rapid anti-body testing.
Nailanad pay iti surat a maipalubos ti interzonal movement dagiti tattao a saan nga authorized outside of residences la ketdi adda ti umno a rason dagitoy ken maitunos iti regulasyon dagiti maseknan a lokalo a gobyerno.
