BAGUIO CITY – Linawlawagan ti gobernador iti Benguet ti immuna a waragawagna a panangkiddawda iti temporaryo a panakasuspindir ti mass testing para iti COVID-19 iti probinsia.
Iti clarificatory statement ni Governor Melchor Diclas, linawlawaganna a ti kiddaw ket saan a para iti entero a probinsia, ngem ketdi, para kadagiti napili a disso nga addaan ti clustering iti kaso ti COVID-19.
Partikular a dinakamatna dagiti mining areas ti Philex Mines iti Tuba ken Itogon ken ti Benguet Corporation iti Itogon.
Linawlawaganna pay nga agtultuloy ti swab testing kadagiti close contacts wenno nakapulapol dagiti kumpirmado a kaso ti COVID-19 kadagiti nasao nga ili, nangruna dagiti makapaspasar ti sintomas.
Dinakamat ni Gov. Diclas a nalimitaran metten ti panaggaraw dagiti indibidual kadagiti nasao a mining areas isut gapuna a no mabalin ket masuspindir pay ti mass testing kadagitoy iti uneg ti 10 nga aldaw sakbay a maituloy manen.
Inlawlawagna a babaen iti daytoy ket maipaayan iti panawen nga agrekober dagiti naiturong kadagiti isolation wenno quarantine facilities ken tapnu makabiruk pay ti lokal a gobyerno iti dadduma a lugar wenno pasdek a mainayon kadagiti agdama ken agkurkurangen nga isolation facilities.
Maipalagip a manarimaan ti panangisayangkat ti National Task Force Against on Emerging Infectious Disease babaen iti Bases Conversion and Development Authority ken John Hay Management Corporation iti expanded COVID-19 testing iti Baguio, La Trinidad, Itogon, Sablan, Tuba and Tublay wenno BLISTT area.
