ITOGON, BENGUET- Agbalbalin latta a parikut ti kinukurang iti danum iti baet a nangrugi ti panagtutudo idiay Itogon, Benguet.
Iti exclusive interview ti Bombo Radyo kenni Cyril Batcagan, dadaulo iti Municipal Disaster Risk Reduction and Management Office (MDRRMO) Itogon, Benguet, kinuna a dakkel ti naapektaran iti epekto iti El Niño iti sektor iti agrikultura gapu paylaeng iti kinukurang iti danum sadiay.
Dagiti kaaduan a naapektaran iti kinakurang iti danum ket iti barangay Tuding, Ucab, ken Virac.
Sigun kenkuana, tunggal summer ket isu ti agbalbalin a parikutda daytoy sadiay.
Iti baet dayta, nangipaay met ti Department of Agriculture iti tulong kadagiti naapektaran a mannalon a nakarehistro iti nasao nga opisina.
Kinuna ni Batcagan, a maipaayan laeng dagiti mannalon a naapektaran a mannalon no nairehistro dagiti mula dagitoy iti opisina ti Department of Agrculture.
Gapu iti daytoy, maal-allukoy dagiti mannalon nga iparehistro dagitoy dagiti mulada.
