Impakaammo ni La Trinidad Mayor Romeo Salda a ti kinakurang ti drainage kanal ti kangrunaan a rason iti pannakalayos ti paset ti Puguis-Buyagan Rotonda, La Trinidad, Benguet.
Napasamak ti panaglayos iti nasao a kalsada gapu iti napigsa a panagbayakabak ti tudo ita nga aldaw ngem nagsubside metlaeng a dagus daytoy.
Iti pannakiuman ti Bombo Radyo kenkuana, kinunana a kurang ti kanal a pagnaan ti danum partikular no napigsa ti panagbayakabak ti tudo gapu ta agsasabat dagiti danum manipud iti ngato a paset pababa iti nasao a kalsada .
Gapu iti dayta, impasiguradona met ti kanayunan a flood control projects tapno manayunan ti kanal nga nga agturong iti bolo creek.
Innayonna pay ni Mayor Salda nga adda ti manamnama a P100 million a mailatang para iti nasao a proyekto.
