BAGUIO CITY- Inlawlawag ti dadaulo ti City Buildings and Architecture Office (CBAO) no apay nga ikalkalikagumda ti panangisumitir dagiti aplikante ti electrical service connection amnesty ti kopya ti tax declaration ti lote a nakaipatakderan ti pagtaengan dagitoy malaksid pay kadagiti dadduma a maikalkalikagum a nailanad iti amnesty ordinance ti Baguio.
Kasaruno daytoy ti panangkwestionar ni Engr. Carlo Bentayen, panakabagi dagiti Accredited Electrical Practicioners no kasapulan ti nasao a kanayonan a dokumento nangruna ta awan ti nasao a dokumento iti listaan dagiti nasken a maisumitir a nailanad iti amnesty ordinance.
Sigun met kenni Architect Johnny Degay, dadaulo ti CBAO, nasken a maiparang ti aplikante ti kopya ti nasao a tax declaration tapno masukimat no ti balay ket naipatakder iti masakupan ti road-right of way, waterway ken forest reservation.
Dinakamatna nga iti amnesty ordinance ti Baguio ket saan a maiyaplikar ti panangited ti amnestiya kadagiti istruktura a naibangon iti masakupan ti forest reservation, watershed reservation ken kadagiti disso nga addaan ti nakapila a demolition order, kadagiti waterways, road-right-of-way ken dagiti naideklara a high-risk areas.
Gapu iti daytoy, imbilin ti lokal a konseho ti panangpalaka pay ti CBAO iti proseso ti panagaplikar iti amnestiya para iti electrical service connection tapnu saan unay a mapadagsenan dagiti aplikante.
Maipalagip nga idi napalabas a bulan ti Abril ti agdama a tawen ket inaprobaran ti lokal a konseho ti siudad ti ordinansa a mangipapaay ti amnestiya kadagiti aplikante ti electric connection nga agpaut ti innem a bulan.
Puntirya ti ordinansa a matulongan dagiti addaan babbalay nga awanan ti building permit ken naibangon kadagiti saan a titulado a sanikua.
