Inwaragawag ti Kingdom of Jesus Christ (KOJC) a mangipaayda iti P20 million a reward money iti makaipaay iti impormasyon nu sino ti nangipaay iti P10 million a donasyon iti Department of the Interior and Local Government (DILG) kas reward money para iti pannakatiliw ti liderda a ni Pastor Apollo Quiboloy.
Sigun kenni Atty. Israelito Torreon, abogado ni pastor Quiboloy, kayat ti KOJC a maammoan nu sino ti nangipaay iti P10 million kenni DILG Secretary Benhur Abalos.
Impetteng ti abogado nga iligal ti panang-awat dagiti public officials iti aniaman a kwarta manipud iti pribado nga indibidual kas nakalanad iti Republic Act 6713 section 70.
Dinakamat pay ni Atty. Torreon a kayat ti Kingdom of Jesus Christ a maammoan nu sino ti adda iti likudan ti pannakabukel ti assasination team a nadutukan a mangpatay kenni Quiboloy.
Kinuna ni Atty. Torreon a ti reward money nga ipaay ti KOJC ket nagtaud kadagiti nagduduma a miyembro dagitoy iti sangalubongan.
Maipalagip nga inwaragawag ti Department of Interior and Local Government idi Hulyo 8 nga ipaayanda iti P10 million a reward money ti makaitudo iti panaglemlemmengan ni pastor Quiboloy ken saggaysa a milyon para kadagiti dadduma nga akusado.
