Impakaamo ti maysa a konsehal iti siudad ti Baguio nga adu a reklamo ti maaw-awatda manipod kadagiti residente seknan iti kinakurang ti panangiprayoridad ti serbisio iti Baguio General Hospital and Medical Center (BGHMC).
Sigun kenni Baguio City Councilor Elmer Datuin, daytoy ti rason nu apay a kayat dagiti sumagmamano nga opisial ti panagadalan ti posibilidad a panangibangon ti ospital nga eksklusibo laeng kadagiti residente iti siudad ti Baguio. Inaklonna a numan pay nasayaat ti panggepna, ti panangiyemlementar ti proyekto ket “complex”- nga isut rason nga umuna a naisayangkat ti feasibility study.
Mapatta-patta a ti panagadal ket makumpleto inton Marso wenno Abril 2026.
Impeksa ti konsehal a nu matakuatan ti panagadal a saan pay a kabaelan ti siudad ti mangbangon iti bukodna a City Hospital, namnamaenna a makasarak dagiti autoridad ti BGHMC iti wagas a mangipangpangruna kadagiti umili ti siudad.
Impunto ni Datuin a ti Summer Capital of the Philippines ket maysa a highly urbanized city ngem agkurkurang iti bukodna nga ospital.
Immanamong met ni Baguio City Health Services Office (CHSO) Chief Celia Brillantes iti inisiatiba.
Inyebkasna ti namnamana a nu maipasdek ti ospital, makaakomodar daytoy iti sangagasut wenno dua gasut a pasiente.
Sigun pay kenni Brillantes, ti siudad ket agbalbalinen kas maysa a medical tourism center.
Inlawlawagna nga adu nga indibidual ti agbibiahe iti siudad para iti konsultasyon wenno mai-admit iti ospital gapu iti dekalidad a serbisio nga ipapaay dagiti medical professionals.
