BAGUIO CITY-Linawlawagan ni La Trinidad Vice Mayor Roderick Awingan nga awan ti panggepna a mangtubngar iti proyekto seknan iti panakaipatakder ti 4-storey mall iti uneg ti Benguet State University (BSU).
Sigun kenkuana, tarigagayna laeng a magna ti proyekto iti umno a proseso.
Kinunana nga iti naawatda nga aplikasyon para iti pannakaipatakder ti nadakamat nga istruktura kas maibasar iti rekord dagitoy iti Municipal Planning and Development Office ken Municipal Engineering Office.
Gapu iti daytoy, dinakamatna a sapulenda pay nga umuna ti land use plan iti unibersidad a maitunos iti pagalagadan ti munisipyo.
Mainaig iti daytoy, kinunana a kasapulan a mangala ti unibersidad iti building permit ken excavation permit sakbayda a rugian ti proyekto.
Inlawlawagna a nasken a maiprosesoda daytoy sakbay a maadaan iti konsultasyon tapnu matalantan iti traffic impact ken environmental impact assessment iti panaipatakder ti nasao a mall.
Sigun pay kenni Awingan, kasapulanda pay iti Free and Prior Informed Consent (FPIC) kas kiddaw dagiti Indigenous People gaputa maibilbilang ti munisipyo ti La Trinidad kas ancestral domain.
Innayonna a suportaranda ti nasao a proyekto iti kanito a sumurotda iti paglintegan ti munisipyo.
