BAGUIO CITY – Idauluan ti lokal a gobyerno ti Baguio ken ti Department of Labor and Employment (DOLE) ti panakabuangay ti kooperatiba para kadagiti ambulant vendors manipud iti nagduduma a paset ti siudad.
Sigun kenni Mayor Benjamin Magalong, ipaayanda iti technical ken financial support ti panakabukel ti kooperatiba dagiti ambulant vendors tapnu mapasayaat ti pagbiagan dagitoy babaen iti mas organisasdo a panagnegosyo.
Kinunana nga ar-aramidenda ti umno a koordinasyon iti DOLE para iti panakairugi ti panag-organisa iti nasao a kooperatiba ken iti panakaipaay ti kasapulan nga stall wenno pwesto kadagiti mabigbig a disso iti nagduduma a paset ti siudad.
Impasiguradona metlaeng ti panakaipaay ti puonan ken equipment para iti pwesto dagiti miembro ti kooperatiba ken ti panakaipasidong dagiti benipisaryo iti panagsanay.
Inyunay-unay ni Mayor Magalong a ti panakabukel ti kooperatiba dagiti ambulant vendors ket makatulong iti permanente a panakarisut ti panagadu dagiti street vendors kadagiti parapubliko a lugar ditoy Baguio.
Innayonna a babaen iti daytoy ket maliklikanen ti panagrikrikos dagiti ambulant vendors iti siudad tapnu agilako iti produkto dagitoy.
Agbalin a libre ti panagmiembro iti kooperatiba ken mailukat kadagiti amin nga ambulant vendors.
Agnumar metlaeng dagiti agbalin benipisaryo iti benipisyo ti operasyon ti kooperatibada.
