Dumanonen iti dandani maysa a milion ti saan pay a narisut a kaso manipud iti Korte Suprema agingga kadagiti nababbaba a korte.
Daytoy ket sigun kenni Senate finance committee chairperson Grace Poe kagiddan ti panangidepensana iti naisingasing a 2025 budget ti Judiciary iti Senate plenary idi Lunes.
Ni Senate President Pro Tempore Jinggoy Estrada ti nangsaludsod maipapan iti bilang dagiti kaso nga agtaltalinaed a pending manipud kadagiti nababbaba a korte agingga iti kangatuan a tribunal.
Maibasar iti report ni Senador Poe, pakabuklan a 933,624 ti saan pay a narisut a kaso iti Pilipinas.
Iti memorandum circular nga impaulog ti Korte Suprema a mangibilin kadagiti nababbaba a korte a mangrisut amin a kaso iti uneg ti 90 nga aldaw, kinuna ni Poe a dagiti hues ken “justices” a saan a mangtungpal iti naipaay a panawen ket maidarum kadagiti kaso nga administratibo.
