Naituding a makipagkita ni Department of Public Works and Highways (DPWH) Secretary Vince Dizon iti Anti-Money Laundering Council (AMLC) inton September 15 tapno talantanen ti posible a panangi-freeze ken panangkumpiskarda kadagiti sanikua dagiti indibidwal a karaman iti naanomalyaan a flood control projects.
Impetteng ni Secretary Dizon a saan nga umdas a maibalud laeng dagiti responsable iti anomalya nu di ket kasapulan a maisubli kadagiti umili dagiti kwarta nga imbulsa dagiti karaman iti anomalya.
Daytoy a tignay a panggep nga ipatungpal ti opisyal ket sapasap kadagiti indibidwal a karaman iti daytoy kas kadagiti napilaanen iti kaso ken dagiti maipilaan paylang.