BAGUIO CITY – Pimmusay ti maysa a laborer kalpasan a nalmes sadiay Gallano river, Hydro No.3, Nangalisan, Tuba, Benguet.
Nabigbig daytoy a ni Rhomel Abubo Balcita, 18-anyos, baro, laborer, tubo ti Bani, Rosario, La Union ken residente ti Immalog Basca, Aringay, La Union.
Maibasar iti interview iti kabsat ti biktima a ni Naomi Janerol Abubo, kabayatan ti panaglanglangoyda iti narabaw a paset ti karayan ket nakangegda ti pukkaw seknan iti malmalmes a lalaki.
Ditoyda metten a saan a masarakan ti kabsatda a lalaki.
Pinadasda pay nga inispal ti biktima ngem saanda a nabaelan gapu iti kapegges ti ayus ti danum.
Iti naisayangkat a search and rescue operation babaen iti nagtipon a pwersa ti Tuba MDRRMO, Tuba BFP, ken Tuba MPS ket nasarakan ti bagi ti lalaki iti alas kwatro dies ti malem.
Naituding met a maiyawid ti bangkay ti biktima iti pagtaenganda sadiay La Union.
