Sumangsango ita iti kaso a robbery ti maysa a lalaki a residente iti Santiago City, Isabela kalpasan a maatap a tinakawna ti kwarta ti maysa a senior citizen idiay Tebteb, Balili, La Trinidad, Benguet.
Iti impormasyon manipod kadagiti kameng iti pulisya, nagturong ti biktima a residente iti Mankayan, Benguet iti pagdagdagusan ti apokona sadiay Balili, La Trinidad itay laeng nabiit.
Sakbay a naturog daytoy iti rabii, imbitinna iti tawa ti bagna a naglaon iti napapateg a kagawaan.
Pasado alas cuatro iti parbangon, nariing ti biktima gapu iti panaguni iti cellphone-na nga adda metlaeng iti asideg iti tawa.
Kagiddan ti panangkitana iti cellphone-na ket nakitana metlaeng ti suspek a mang-gawgaw-at ti bagna a nakabitin ti tawa.
Nupay kasta, dagus a timmaray ti suspek apaman a nadlawna a nakita isuna ti biktima.
Kasaruno dayta, in-check ti biktima ti bagna ket naduktalanna nga awanen ti kawes a nangibalkutanna iti kwartana a dumanon iti PhP45,000, kasta metten ti coins a dumanon iti PhP700, ken nagduduma nga ID.
Naarestar ti suspek ken narekober manipod kenkuana dagiti Identification Cards ti biktima.//Bombo Noveh Organo
