BAGUIO CITY – Sumangsango iti kaso a panaglabsing iti RA 9165 wenno Comprehensive Dangerous Drugs Act of 2002 ken RA 10591 wenno Comprehensive Firearms and Ammunition Regulation Act ti maysa a lalaki gapu iti panangimetna iti iligal a droga ken paltog iti naisayangkat a drug buy-bust operation kontra kenkuana sadiay Bulanao, Tabuk City, Kalinga idi Sabado, Agosto 10.
Nabigbig daytoy a ni Rogelio Paut, 42-anyos, addaan ti asawa ken residente ti Bugnay, Tinglayan, Kalinga.
Sigun kadagiti pulis, nakemmeg metlaeng iti operasyon ti dua a menor de edad a kadwa ti suspek a nakitransaksion iti operatiba ti pulisya.
Nakumpiskar kenni Paut ti 25 a pidaso ti sag-60mL a botelya ti liquid substance a mapapati a marijuana oil nga aggatad ti dumanon P3-M.
Nakumpiskar pay kenkuana ti maysa a caliber 45 a naglaon ti magazine nga addaan ti pito a bala ken ti cellphone ken motorsiklo a naaramat iti transaksion bayat a narekober ti naaramat a buy-bust money.
Nakabalud ita ni Paut bayat a naipaima iti DSWD dagiti dua a menor de edad para iti umno a panakiballaet.
