BAGUIO CITY – Pimmusay ti maysa a lalaki kalpasan a nalmes iti paset ti Bued River sadiay Dungon, Camp 1, Tuba, Benguet idi malem kalman.
Nabigbig daytoy a ni Peter John Ero Cruz, 21-anyos, residente ti Upper Malvan Street, Trancoville, Baguio City.
Maibasar iti report ti pulisya, naka-awatda ti tawag manipud iti maseknan nga umili maipanggep iti maatap nga insidete ti panakalmes iti nasao a karayan.
Dagos nagrespodne dagiti pulis ken sadiay a naduktalan iti imbestigasyonda a naudi a nakita ni Cruz nga aglanglangoy iti nasao a karayan, pasado alas tres ti malem.
Nupay kasta, kalpasan ti sumagmamano a minutos ket saanen a nakita ti maysa a backhoe operator ti nasao a biktima manipud iti danum a rason iti panagkiddawna ti tulong.
Agarup alas-tres kwarenta ti malem ket nasarakan ti bagi ti biktima ken dagos a naiturong iti pagagasan nupay naideklara a pimmusay daytoy.
