Sumangsango iti reklamo a 2-counts frustrated homicide ti maysa a lalaki kalpasan a tinagbatna ti dua a kakabsatna a lalaki sadiay La Paz, Abra itay laeng nabiit.
Nabigbig ti suspek a ni Jose Castillo, 50-anyos bayat a nabigbig met ti dua a kakabsatna a da Rodel, 46-anyos ken Arnold, 44-anyos, agpapada a residente ti Barangay Benben, La Paz, Abra.
Naduktalan iti imbestigasyon ti pulisya a bayat ti panagi-inom dagiti agkakabsat iti balay ti suspek a nagkasangay ket timmaod ti saanda a panagkinna-awatan.
Nagtinnag daytoy iti panangtagtagbat ti suspek kadagiti dua a kakabsatna idi rabii ti Dominggo.
Nagsagaba dagiti agkabsat iti sugat iti ulo ken dadduma a paset ti bagi dagitoy.
Naitaray dagitoy iti Abra Provincial Hospital ken madaman nga agpapaimbag.
Dagus met a nakemmeg ti suspek ken nakumpiskar ti buneng nga inaramatna.
Sigun iti pulisya, napasamak ti nasao nga insidente gapu iti impluwensya ti arak ken gapu iti saan a panagkikinna-awatan dagitoy seknan iti daga.
