BAGUIO CITY – Pimmusay ti maysa a driver kalpasan a natnag ti motorsiklona iti baba ti kalsada iti deppaar ti Nueva Vizcaya – Benguet Road, partikular sadiay Tocmo, Loacan, Itogon, Benguet idi Sabado, May 4.
Nabigbig daytoy a ni Sandy Antero, 27-anyos, naasaawan ken residente ti Upper Bakong, Loacan, Itogon, Benguet.
Maibasar iti report, paawid ti biktima ken napartak ti patarayna iti motorsiklona.
Nagresulta daytoy iti aksidente a panangdungpar ti motorsiklo iti kongkreto a barikada iti igid ti kalsada agingga a natnag iti mapattapatta a 50 a metro iti baba ti kalsada.
Gapu iti daytoy, nagsagrap ti biktima iti adu a dunor iti ulona ken idi naitaray iti pagagasan ket naideklara a dead on arrival.
Nagkedked ti pamilya ti biktima nga ipasidong iti otopsiya ti bangkay daytoy gaputa patienda nga aksidente ti napasamak.
