BAGUIO CITY – Pagsagsaganaan ti Barangay Irisan ti isasangbay ti La Niña phenomenon iti siudad ti Baguio.
Iti interview ti Bombo Radyo kenni Barangay Captain Arthur Carlos, nabilin dagiti residente a dalusanda dagiti kanal ken i-safetyda dagiti basura dagitoy tapno saan a maipullat kadagitoy apaman a sumangbay ti panagtutudo.
Kinunana pay a rinugiandan ti panagikkat kadagiti narisgo a kayo ken sanga dagitoy idi napan a tawen.
Iti agdama, bambantayanda ti Purok 1, Purok 24 ken bantay sadiay Balenben gapu paylaeng iti narisgo a panagreggaay ti daga.
Iti sabali a bangir, supsuportaran ti nasao nga opisyal ti plano ti City council a leachate treatment plan iti sigud a dumpsite sadiay Irisan.
Sigun kenni Carlos, agtaltalinaed a solid ti basura nga adda iti uneg daytoy iti nupay man nabayagen a naiparikep ken nagbalin nga eco-park ti partikular a lugar.
Margsakan met daytoy ken namnamaenna a maipaay ti long term solution para iti nasao nga isyu para iti kinatalged ti lugar ken dagiti umili.//Bombo Marinel Rodrigo
