BAGUIO CITY – Linawlawagan ti Land Transportation Office (LTO) – Cordillera a para laeng kadagiti nakukurapay ti programa ti ahensia a libre nga enrollment para iti 15-hours theorotical driving course.
Sigun kenni LTO-Cordillera Regional Director Francis Ray Almora, kasapulan a maipangruna dagiti nakukurapay nangruna ta puntirya ti nasao a programa a tulungan dagiti estudyante a karaman kadagiti nakukurapay a pamilya.
Kinunana a gapu iti daytoy ket sapulenda kadagiti panggepna nga ag-enroll iti nasao a kurso ti certificate of indigency manipod ti barangay wenno sertipikasyon a dagitoy ket karaman iti Pantawid Pamilya.
Kagiddan iti dayta, immapela daytoy kadagiti indibidual a makabael nga agbayad nga agturongda laeng kadagiti LTO-accredited a private driving schools tapnu maipaayan met dagiti nakukurapay iti gundaway nga agnumar iti nasao a programa ti ahensia.
