BAGUIO CITY- Naituding a maipatungpal iti siyudad ti Baguio ti libre nga operasyon ken pannakaagas ti clubfoot, a maysa a kita ti sagubanit iti saka.
Daytoy ket babaen iti Philippine NGO Council on Population, Health and Welfare wenno PNGOC iti Baguio General Hospital and Medical Center.
Sigun kenni Mayor Benjamin Magalong, rumbeng a gundawayan dagiti residente nangruna dagiti ubbing nga addaan iti nasao a kita ti kondisyon ti MiracleFeet program.
Sigun kenni PNGOC Executive Director Chi Laigo Vallido, nalaklaka a marisut ti clubfoot no nasapsapa a maagasan daytoy.
Iti taripnongda iti mayor, kinunana a 3,500 a maladaga ti maipaspasngay iti pagilian iti tunggal tawen nga addaan iti clubfoot.
Nupay kasta, 15 percent laeng kadagitoy ti maag-agasan gapu iti kinakurang ti panakaammo dagiti tattao iti nasao a programa ken gapu iti pakaseknan iti gastos.
Impanamnamana a libre ti programa nga ipaay dagitoy babaen kadagiti 30 a partner clinics ken hospital iti intero a pagilian a pakairamanan ti Baguio General Hospital and Medical Center ken Benguet General Hospital.
