SABLAN, BENGUET – Agpapaimbag iti ospital dagiti lima a pasahero bayat a nakaruar metten dagiti sangapulo ket maysa a dadduma pay kalpasan a naaksidente dagitoy idiay Ampusa, Banangan, Sablan, Benguet, 6:30 pm idi rabii.
Iti interview ti Bombo Radyo iti Sablan Municipal Police Station, paturong ti pampasahero a jeep idiay Sablan idi napasaran ti lost brake rason nga indungpar ti driver iti roadside riprap a nangitunda iti pannakabaliktad ti lugan.
Sigun met iti 33-anyos a driver, awan ti nadlaw wenno nariknana a deperensiya ti imanmanehona a jeep sakbay ti panagbiahena ngem idi nakadanunda iti pakurba a paset ti kalsada ket ditoy a nadlawna a limmukay ti brake ti lugan.
Gapu iti daytoy, indungparna ti lugan iti igid ti kalsada tapno saan a matnag dagitoy.
Lima kadagiti pasahero pakairamanan dagiti dua a menor de edad ti nagsagrap iti fracture ken dislocation iti nagduduma a paset ti bagida ken kasapulanda ti 30 days a medical attention.
