Tiniliw dagiti pulis ti Sweden ti lima nga indibidual kalpasan a napaltogan ti maysa nga Iraqi anti-Islam campaigner sumagmamano nga oras sakbay a maipaulog ti sentensia ti korte seknan iti panangpuorna iti Koran.
Nakemmeg dagiti lima nga adda pakainaiganda iti panangpaltog kenni Salwan Momika, 38, maysa nga Iraqi refugee, iti maysa a pagtaengan iti ili ti Sodertalje iti asideg ti Stockholm, ken imbilin ti maysa a prosecutor a maibalud, sigun iti maysa a pulis.
Pinuoran ken rinugitan gamin ni Momika dagiti kopia ti Koran, ti nasantuan a libro dagiti Muslim, iti publiko ken kadagiti social media broadcast idi tawen 2023.
Ti panaguram ti Koran dagiti Muslim ket maibilang kas maysa a “blasphemous” a tignay gaputa ikonkonsiderada a literal a sasao ti Dios.
Iti baet a kinondenar ti gobierno ti Sweden ti panaguram ti Koran idi tawen 2023, nasaknap a maibilang ti nasao a tignay kas nasalakniban a kita ti nawaya a panagsao.
Maipalagip nga idi tawen 2023, kinuna ni Iranian Supreme Leader Ayatollah Ali Khamenei a dagiti tattao a mangrugit wenno mangpuo ti Koran ket sumango iti nakaro a pannusa.
