BAGUIO CITY – Nangrugin ti panakaisayangkat ti limitado a face-to-face classes iti innem nga unibersidad ken institusyon iti rehiyon Cordillera kalpasan nga inaprobaran ti Commission on Higher Education (CHED)-Cordillera ti nasao a wagas ti panagadal.
Iti panakiuman ti Bombo Radyo Baguio, kinuna ni CHED-Cordillera Regional Director Dr. Demetrio Anduyan Jr. a dagiti laeng health and allied health courses kas iti nursing ti naipalubos a mangisayangkat iti limited face-to-face classes.
Dinakamatna a dagiti nasao a pagadalan ket ti Benguet State University, University of Baguio, University of the Cordilleras, Saint Louis University, Easter College ken Cordillera Career Development College.
Inlawlawagna a nakapasa dagitoy iti panagsukimat dagiti maseknan nga ahensia kalpasan a nakita a kabaelan dagitoy a mangisayangkat ti limitado a face-to=face classes.
Inlawlawag pay ni Dr. Anduyan Jr. a dagiti laeng health and allied health courses ti napatgan para iti limited face-to-face classes gaputa kayatda a no agkurang dagiti mangisaysayangkat ti panagbakuna kontra iti COVID-19 ket makatulong dagiti estudyante kadagiti nasao a kurso.
