Awan ti panggep iti Department of Health (DOH) a mangiyimplimintar iti lockdown gapu iti flu wenno influenza-like illnesses.
Sigun kenni DOH Secretary Teodoro Herbosa, palso ti damag nga adda iti mapangpanggep a lockdown gapu iti nasao a sakit.
Inlawlawag ni Herbosa a ti mapaspasaran ita ket seasonal respiratory illnesses ken saan a flu outbreak.
Innayonna a gapu ta tiempo ita dagiti influenza-like illnesses, adu dagiti tattao a makapkaptan iti daytoy a makapaspasar iti nagduduma a sintomas kas iti uyek, panateng, gurigor ken daduma pay a kapada daytoy.
Sigun pay iti opisyal, awan ti sakit nga agraraira ita a nagtaud iti maysa a klase iti virus ken saan a kasapulan a maideklara ti lockdown.
Iti baet dayta, inyunay-unay ni Herbosa a nasaysayaat nu agaramat iti face masks nu adda ti pagturungan ken agtalinaed iti pagtaengan nu agsagsagaba iti nasao a sakit.
