Impasigurado ni Land Transportation Franchising and Regulatory Board (LTFRB) Chair Vigor Mendoza kenni Mayor Benjamin Magalong nga awan ti nairuar a baro a prangkisa iti transportasion iti siudad nga awanan iti nasayaat a konsultasion iti lokal a gobierno.
Iti mensahe ni Mendoza kenni Mayor Magalong, kinunana a sipud idi nagtugaw daytoy idi Oktubre 2025, awan pay ti baro a nalukatan a prangkisa—karaman dagiti taxi iti siudad—ken dagiti sumaruno a pangngeddeng ket maaramid laeng nu adda ti endorsement iti siudad.
“I assure you that we will not open any new franchise without consulting and getting your favorable endorsement.”
Land Transportation Franchising and Regulatory Board (LTFRB) Chair Vigor Mendoza
Inawat met ni Mayor Magalong ti nasao nga statement ken inallukoy ti LTFRB nga adalen manen ti Local Public Transport Route Plan (LPTRP) iti siudad.
Impaganetgetna a napateg ti data-driven iti panang-ammo iti umno a bilang dagiti Public Utility Jeepney (PUJ) ken ruta.
Insingasing metlaeng ni Mayor Magalong ti panangkessay iti bilang iti taxi units bayat a mapapangato ti kapasidad iti dadduma a parapubliko a transportasion tapno malag-anan iti nakaro a trapiko iti siudad.
Maibasar iti datos manipod 2023, 42% dagiti lugan iti kalsada ket taxi, 31% ti private vehicle, 16% ket motorsiklo, 8% ket PUJ, ken 3% ket truck ken bus.
Kas sungbat, inkarini ni Mendoza a dagosda a pagsaritaan dagiti isyu ken posible a mangisayangkat iti courtesy meeting kadua dagiti opisial iti siudad tapno mangbukel iti kongkreto nga addang.
Kinumpirmar met ti nasao nga opisial a makikoordinarda kadagiti regional transport officials para iti nasao a meeting.
Ti nasao a banag ket kasaruno ti panangbabalaw ni Mayor Magalong iti singasing a manayunan iti 100 electric taxi iti siudad, gapu iti nangato a bilang a taxi units nga agbibiahe.
Impaganetget iti opisial a saanna a patgan ti singasing iti agdama a kita daytoy, numan pay nakalukat daytoy iti electric vehicles para iti aglawlaw—ngem rumbeng nga adda ti “one-in, one-out” a polisia tapno saan a kumaro ti trapiko.
