Inwaragawag ti Philippine National Police (PNP) nga adda dagiti immasideg ken nagkammang kadakuada a nangibaga a karamanda kadagiti nabiktima ni Kingdom of Jesus Christ (KOJC) leader Apollo Quiboloy.
Sigun kenni PCol. Jean Fajardo, spokesperson ti PNP, dagiti maatap a biktima ket immasideg kadagiti pulis bayat ti pannakaiserbi ti warrant of arrest kontra kenni Quiboloy ken bayat ti kaadda dagiti otoridad iti compound ti KOJC idiay Davao City.
Dinakamat ni PCol. Fajardo a dagiti maatap a biktima ket kinunada a naabusoda.
Gapu iti daytoy, manarimaanen ti koordinasyon ti PNP iti Department of Social Welfare and Development (DSWD) gapu ta dadduma kadagiti maatap a biktima ket menor de edad.
Iti agdama ket awan paylaeng ti inruar nga statement ni Atty. Israelito Torreon, legal counsel ni Quiboloy maipapan nasao nga isyu.
Maipalagip a sumangsango iti nagduduma a kaso ni Quiboloy iti pagilian gapu iti maatap a panaglabsing iti Special Protection of Children Against Abuse, Exploitation, and Discrimination Act ken human trafficking.
Sumangsango metlaeng daytoy iti nagtutuon a kaso idiay Estados Unidos pakairamanan ti sex trafficking by force, fraud, coercion ken sex trafficking of children; sex trafficking by force, fraud and coercion; conspiracy; ken bulk cash smuggling.
