BAGUIO CITY – Naiturong iti pagagasan ti maysa a drug personality kalpasan a natamaan daytoy kasaruno ti panakipinnaltogna kadagiti operatiba ti Drug Enforcement Unit (DEU) ti Baguio City Police Office (BCPO) idi agsapa kalman sadiay San Vicente, Baguio City.
Nabigbig daytoy a ni Jeffrey Pascua Tolentino alyas Epoy, 35-anyos, residente ti SLU-SVP Housing VIllage, Baguio City.
Sigun kenni PCol. Allen Rae Co, direktor ti BCPO, ni Tolentino ket maysa a high value individual ken maika-walo iti Top 10 drug personalities ti entero a rehion Cordillera.
Kinunana nga insayangkat dagiti operatiba ti BCPO-DEU ti buy-bust operation kontra kenni Tolentino iti koordinasyon ti PDEA-Cordillera.
Inlakona ti maysa a pakete ti maatap a shabu nga agdagsen iti agarup nasurok maysa a gramo iti nakatransaksionna nga operatiba.
Nupay kasta, kabayatan ti panangkemmegda kenkuana ket simrek iti luganna a hilux nga addaan plaka a CAN 5369 ken ginandatna ti aglibas.
Kinuna ni Co a kabayatan ti panaglibas ni Tolentino ket nadungparna ti maysa a closed van ken maysa a taxi nupay saan met a naan-ano dagiti driver dagitoy ken ti pasahero ti taxi.
Ginandat manen ni Tolentino ti aglibas babaen iti panagpalpaltogna kadagiti operatiba isut gapuna a pinalpaltogan met dagiti operatiba ti luganna a nagresulta iti panakatama ti luppona.
Dagus a naitaray daytoy iti pagagasan bayat nga iti imbentaryo dagiti otoridad ket nakumpiskar pay iti lugan ti drug personality ti tallo pay a kanayonan a pakete ti maatap a shabu ken ti paltog nga inaramat daytoy. (with reports from Bombo Florence Paytocan)
