BAGUIO CITY – Nagpositibo iti COVID-19 ti maysa manen a nurse ti Baguio General Hospital and Medical Center (BGHMC).
Maibasar iti datus, daytoy ti maikadua a nurse ti nasao a pagagasan a nakaptan ti COVID-19 ken naamuan a daytoy ket 22-anyos, babai ken residente ti Tawang, La Trinidad, Benguet.
Sigun kenni Dr. Leamor Fangonilo, dadaulo ti Public Health Unit ken Liason Officer ti BGHMC, manarimaanen ti nainget a contact tracing dagiti maseknan nga opisina ken ahensia kadagiti nakapulpulapol ti nasao a nurse a nakadestino iti non-COVID ward ti BGHMC.
Dinakamatna a maisaysayangkaten dagiti dadduma pay a kaskenan nga addang kas iti quarantine, disinfection ken medical interventions tapnu maprebentaran ti panakaiwaras ti virus a kimpet iti nasao a nars.
Nailawlawag met a maibilang ti nasao a kaso iti listaan ti Baguio gaputa kaaduan a contacts daytoy ket iti BGHMC.
Kabayatana, naipasidong iti Extreme Enhanced Community Quarantine ti Lower Boted, Tawang a pagnanaedan ti nasao a nars nangrugi iti ala una ita a malem agingga nga adda ti sumaruno a paka-ammo manipud iti opisina ti mayor ti La Trinidad.
Manarimaan metten ti contact tracing iti nasao a lugar.
