BAGUIO CITY – Nailukat ti maikadua a ruta para iti programa ti Land Transportation Franchising and Regulatory Board (LTFRB) a 24/7 free ride para kadagiti amin a health care workers iti rehion Cordillera.
Iti paka-ammo ti LTFRB-Cordillera, nangrugi ti nasao a serbisyo iti alas dose iti pangaldaw ita nga aldaw, April 29 ken daytoy ket maawagan ti Irisan route line.
Saksakupen ti maikadua a ruta ti Irisan Jeep Parking Area – Elpidio Quirino Highway – Irisan Fire Station – Cooyesan Plaza – F. Yandoc Street – Benjamin Salvosa Drive – Shanum Street – Abanao Street – Elpidio Quirino Highway wenno Naguilian Road – Cooyesan Plaza – Irisan Fire Station – Irisan Jeep Parking Area.
Maikalkalikagum laeng ti panangiparang dagiti health care workers iti IDs dagitoy kadagiti drivers para iti panakabigbigda.
Maipalagip a ti 24/7 free ride para kadagiti healthcare workers ket sakop ti Service Contracting Program ti LTFRB ken Department of Transportation ken ditoy rehion Cordillera ket pagnumaran ti 43 nga yunit ti moderno a jeep, parapubliko a bus ken tourist van nga agbiahe iti inisyal nga 11 a nabigbig a ruta.
Tarigagay ti programa a matulongan dagiti drivers a nakaro a naapektaran iti agdama a pandemya ken matulongan dagiti health workers iti pakaseknan iti panagbiaheda paturong iti pagtatrabahuan dagitoy.
