Inyunay-unay ni Engr. Bonifacio Dela Peña, City Administrator a saan pay a naaprobaran ti singasing maipapan iti P250 congestion fee iti central business district.
Iti panakiuman ti Bombo Radyo kenkuana, kinunana nga adalenda pay ti nasao banag ken ado pay a proseso ti pagdalanan daytoy kas iti public consultation, negotiation, panag-aprobar ti Development Council, dumalan kadagiti konsehal, public bidding, ken panaka-draft ti kontrata sakbay a maipatungpal.
Sigun kenni Dela Peña, ti congestion fee ket paset ti Smart Urban Mobility Project nga addaan panggep a maimanehar ti trapiko iti siudad ken mapasayaat ti transportasyon iti siudad.
Daytoy ket singasing ti pribado a kompanya kas maibasar iti ipatpatungpalda a panagadal.
Malaksid iti dayta, karaman kadagiti plano para iti Smart Urban Mobility Project ket ti Advanced Traffic Management System, Smart Parking Management Solution, Advanced Public Transport Management Solution, Mobility Fee Program.
Kabayatanna, inlawlawag ni Dela Peña a ti mapangpanggep a congestion fee ket makolektar wenno masingir laeng tunggal peak hours daytoy ket iti las-od ti dua nga oras iti agsapa kasta met iti sardam bayat nga adda met dagiti mailaksid iti nasao a singasing.//Bombo Mera Pacpacan
