Inwaragawag ni President Ferdinand Marcos, Jr. a mangrugi inton Martes, Abril 14, maipatumpal ti dakkel a rollback iti presyo ti petrolyo.
Dumanon iti agarup P20 ti maikissay iti presyo ti diesel bayat a P4.43 met ti kissay iti tunggal litro ti gasolina.
Kabayatanna, bumaba iti P8.50 tunggal litro ti presyo ti kerosene.
Sigun kenni President Ferdinand Marcos, dakkel a gin-awa daytoy kadagiti driver, commuter ken kadagiti Pilipino nga agtultuloy nga maapapektaran iti nangato a presyo ti krudo.
Nupay kasta, innaklon ti presidente a saan nga umdas ti nasao nga addang.
Impettengna nga agtultuloy latta nga agbirbirok ti gobyerno ti pamay-an tapno makissayan ti epekto ti panangngato ti presyo dagiti gagatangen.
Impanamnama ni President Ferdinand Marcos nga awan ti mabaybay-an a Pilipino iti tenga ti mannarimaan a krisis ken agtultuloy ti panangreget ti gobyerno tapno marikna ti amin ti gin-awa. //bombokaren.c.s
